鄧佩儀首度挑戰舞台劇 現場唱英文歌克服恐懼 感動觀眾落淚. 33歲嘅前國際中華小姐冠軍鄧佩儀（Gloria），2022年重返校園，喺加拿大UBC尚德商學院修讀工商管理學士學位及電影製作課程。畢業後佢表示會留喺當地發展，間接宣布離巢TVB，但佢未有放棄演藝夢，不時登台演出，近日更首度挑戰舞台劇！Gloria喺IG晒出參演舞台劇嘅劇照，並寫長文分享感受：「啱啱完成咗我人生中第一個舞台劇演出，真係非常感謝所有參與其中嘅人——台前幕後嘅演員、工作人員，以及所有讓今次演出成真嘅大家。過去幾個月嘅排練同努力，對我嚟講都係一段好開心又充實嘅旅程，亦令我學到好多。」
Gloria坦言對佢嚟講，其中一個最大嘅挑戰就係現場演唱英文歌曲：「因為我平時幾乎只唱中文歌，好少唱英文歌，所以一開始冇乜自信。但我好開心自己最後成功克服咗呢個恐懼。」而最令佢感動嘅，係知道佢哋嘅故事真係打動咗觀眾：「睇到觀眾因為我哋嘅演出而感動落淚，令我有好大嘅滿足感，亦再次感受到故事與表演嘅力量。」佢仲承諾好快就會分享演出片段。
