愛回家角色回顧｜呂慧儀「熊若水」拜金女變賢妻 龔水CP越難越愛. 呂慧儀喺《愛·回家之開心速遞》入面飾演熊家二家姐熊若水，呢個角色集合咗典型「港女」嘅好多特質：貪靚、鍾意名牌、有小聰明。
而且，口齒伶俐嘅熊若水都有唔少毒舌口頭禪，佢最愛對外甥金城安（周嘉洛飾）講：「乜大學咁教你㗎咩？」對老公龔燁（張景淳飾）都會「動口又動手」：「食蕉連皮啦你！」成為唔少網民平日生活裡會搞笑模仿嘅對象。
再譬如喺職場上嘅熊若水，曾經為咗「反抗」大龍生（羅樂林飾）將原本快將屬於自己間房讓畀風少（陳浚霆飾），自己強行打造咗一個「私人辦公室」，為其他人帶嚟諸多不便，眾多毛毛飾物更搞到老公龔燁鼻敏感！
不過，呂慧儀將呢啲原本可能唔太討好嘅地方，演繹出一種毫無城府嘅傲嬌與可愛，有陣時仲有啲天然呆。而且，連最「難搞」嘅大小姐龍力蓮（林淑敏飾）都搵熊若水做秘書，當佢係得力助手，可見佢雖然喺職場上有少少「橫衝直撞」，但工作能力絕對唔一般。
喺「熊家」嘅夾縫中生存熊若水喺熊家嘅定位一直非常微妙。上面有強勢惹唔起嘅大編劇家姐熊尚善（滕麗名飾），下面有讀書厲害但有時缺乏生活常識嘅細妹熊心如（蘇韻姿飾），身邊仲有個永遠喺度闖禍但最受家人愛錫嘅外甥金城安（周嘉洛飾）。
夾喺中間嘅熊若水，自認成日被爸爸熊樹根（劉丹飾）忽略，所以由細到大都耿耿於懷，仲同細妹熊心如經常有拗撬。
熊若水表面強悍，好似有一層堅硬嘅外殼，講說話又「巴巴渣渣」，但實際上口硬心軟，愛錫家人，且為朋友著想，對愛情嘅態度亦係寧缺勿濫。
一波三折嘅「龔水」戀講到熊若水，最精彩嘅必然係佢同龔燁經歷無數波折嘅感情線。兩人早年曾為上下屬，卻因龔燁喺工作上陷害熊若水導致佢離職，令熊若水自此記恨對方。直至龔燁加入接龍集團，熊若水依然視呢個老對手為「死賤精」，雙方經常喺辦公室針鋒相對。
不過，一次密室被困嘅經歷，先令到龔燁睇見熊若水藏喺背後嘅善良，自此心生愛慕並決心痛改前非。雖然龔燁一度因為保護若水對抗雷珍妮而毅然辭職遠赴新加坡，但呢份情緣並未因此劃上句號。
當龔燁其後獲邀回歸接龍出任總監後，佢以朋友身份重新追返熊若水，兩人互生好感。期間雖然經歷咗兩度表白失約嘅無奈，以及雷珍妮以狄仁傑下落脅迫龔燁同赴哈爾濱嘅誤會，但熊若水始終給予對方絕對嘅信任。最終，喺熊若水協助龔燁解開多年心結後，兩人於白色情人節互相示愛，正式成為情侶。
呢段感情一波三折，其後又通過咗愚人節求婚誤會、喜湘飛介入等重重考驗，先至順利訂下婚約並正式成婚。即使婚後數年再次面對龔燁短暫離港公幹、甚至意外失憶等波折，但熊若水亦未有動搖呢份感情，令觀眾動容。同時，網民亦萬分期待喺即將到來嘅大結局見證愛情結晶「龔丸」嘅誕生。TVB
