羅家英「借花敬佛」送米雪阿姐私藏 驚爆汪明荃30年三度遭竊失600萬首飾. 米雪為慶祝入行55年舉行《友你有米55派對騷》，因反應熱烈宣布加開場次，昨日（18日）在記者會上分享籌備點滴，好友羅家英、白彪及羅霖亦現身打氣。活動上，羅家英送上一支摩登金釵，祝願米雪喺舞台上有更多造型變化。羅家英接受傳媒訪問時，透露呢支金釵其實係太太汪明荃嘅私人收藏，又開玩笑話自己係趁太太唔注意時偷偷拎過嚟送禮，並表示太太向來錫後輩，知道係送畀米雪一定唔會介意。米雪聞言亦笑指阿姐一向大方，實會隻眼開隻眼閉。
除咗「大膽」拎太太嘅私藏送禮，羅家英更喺訪問中爆出汪明荃過去三十年嘅驚人失竊史。佢指出阿姐多年來曾遭遇三次入屋爆竊，損失包括佢歷年嚟送贈嘅鑽石、手鐲、頸鏈以及多隻名錶，財物總值高達港幣600萬元。羅家英分析，賊人非常熟悉太太嘅行程，往往瞄準佢外出參與《歡樂滿東華》或TVB台慶等大型活動、將貴重首飾帶出工作時下手。佢更透露賊人嘅手法相當高明，每次都趁屋內冇人，甚至準確計算到工人外出放狗嘅短短15分鐘空檔潛入爆竊。
雖然損失高達600萬，但羅家英表示同太太心態豁達，認為呢啲財物只係過眼雲煙，仲自嘲屋企係越偷越旺。一旁嘅米雪隨即出言制止，笑稱唔好再透露細節，免得再次引起賊人注意。羅家英隨即補充話而家已經學精，貴重物品唔會再放喺屋企，亦加裝咗嚴密嘅防盜系統，即使再有賊人入屋都冇嘢偷。米雪打趣叫佢賺錢再買新款首飾補償太太，羅家英則幽默回應話而家買嘅都係假貨，認為咁樣做先係知慳識儉嘅防賊妙計。TVB
