香港探秘地圖｜龔嘉欣重現《殺手》型格Look 爆炸頭魚網絲襪超搶Fo 犧牲靚樣貼鏡頭：我冇包袱. 《香港探秘地圖》今晚（18日）首播，龔嘉欣飾演嘅打假網紅畢萍，喺自己頻道專門拍片踢爆假貨，第一集就以爆炸頭加黑色魚網絲襪嘅《殺手》經典造型登場，令觀眾眼前一亮。
劇情講到畢萍去藥房踢爆一盒聲稱韓國製造嘅粉底，後面竟然有越南文，佢大大聲話「分明係假貨」，仲話自己用完皮膚敏感，呼籲大家唔好幫襯。藥房老闆當然唔高興，職員仲拉佢埋鏡頭，令佢成塊面貼實鏡頭，超醜樣！畢萍即刻鬧爆拍檔華叔：「你可唔可以對自己有啲要求，影到咁樣都收貨？你影到我喪屍咁，條片出街我又點見人呢？」華叔就回佢一句：「你又話最緊要件貨，又冇失去焦點……你係畢萍，又唔係柯德莉夏萍。」場面搞笑。
龔嘉欣接受TVB.com獨家訪問，話呢個造型係參考《殺手》：「其實試咗好多個髮型，最初連個頭都係粉紅色就太似《殺手》，最後揀咗呢個爆炸頭，希望角色更鮮明。」對於要犧牲靚樣貼鏡頭，嘉欣話絕唔覺得犧牲：「我不嬲都冇包袱，拍嗰陣有工作人員話咁樣好核突，但我覺得唔緊要，只要劇情需要，大家睇得開心就得，唔會計較呢啲。」佢仲喺網上甫出花絮相，話「Dark Angel 重現江湖！😎有任務！」網民紛紛大讚佢可愛，話呢個造型熟口熟面。TVB
