正義女神｜陳煒晒私伙黑色內衣 激吻古天祥獲讚52歲完美狀態
有「美魔女」之稱嘅陳煒，近日喺TVB熱播劇《正義女神》入面，同古天祥（Carlos）上演一場火辣辣嘅激吻床戲，睇到觀眾血脈賁張。劇情講述煒哥飾演嘅大狀「高淑樺」因為案情困擾心情低落，於是走去搵Carlos「調劑」一下，一嚟就連環攬錫兼上埋床，節奏明快，短短幾分鐘已經令觀眾睇到熱血沸騰。
煒哥喺呢場戲入面毫無保留，咀得非常肉緊，兩人瞬間投入激情狀態。最搶眼嘅係，煒哥出動咗私伙黑色Girdle內衣，激咀時唔單止露出白滑香肩，仲若隱若現晒出美好身材，盡顯女人味。
呢幕戲一出街即成為網上焦點，大批觀眾激讚52歲嘅煒哥保養得宜，身材樣貌都仲係咁完美，拍出嚟嘅感覺魅力十足。煒哥事後透露，呢場戲好特別，總監製鍾澍佳曾經問過佢想同邊個男演員拍，佢二話不說就揀咗相識多年嘅古天祥，因為兩人之前拍過情人節宣傳片已經有床戲經驗，「做生不如做熟」，結果效果出奇地好。佢仲話其實拍咗好多畫面，只係最後剪出街嘅唔多。
煒哥亦都有事先同老公陳國強醫生申報會拍呢場激烈戲，幸好老公好體諒，仲講笑話場戲咁短，冇問題。
《正義女神》逢星期一至五晚8:30翡翠台播出。TVB
