周志康專訪｜相隔17年重返歌唱擂台 闖《中年好聲音4》：太太令我放心向前衝.無綫人氣歌唱比賽《中年好聲音4》今季新增的「決戰TVB藝人賽區」，自開播以來就掀起全城熱話。十位參賽藝人戴住神秘面具登場獻唱，懸念十足的賽況與隱藏身份，成為網民熱議焦點。當中憑一曲《Touch》斬獲5燈滿分、唱功穩定驚艷觀眾的「企鵝人」，正是2009年憑《超級巨聲》入行的周志康（Daniel）。事隔17年再度踏上歌唱比賽的擂台，今年36歲的他坦言，這趟旅程滿是意外驚喜，而背後最想多謝的，是一直默默支持自己的太太，溫馨美滿的家庭，更是他一路向前的最大目標。
2009年，19歲的周志康憑《超級巨聲》正式入行，近年逐漸轉型演員路線，加入無綫後一直默默耕耘，不論拍劇還是唱歌都肯搏肯試，雖未算一線大紅，卻早已憑扎實的演出成功入屋。今次相隔十幾年再戰歌唱比賽，他直言契機來得十分突然：「當初係經理人一個電話打過來，話公司開放藝人賽區，問我有冇興趣玩下。當時我心入面都打鼓，入行咁多年，唱歌淨係限於同朋友去下卡拉OK，根本唔係長期備戰狀態。由通知我參賽，到要唱第一首歌，中間淨係得五日時間，一路都係度諗自己到底得唔得。後來又諗，輸都冇所謂，不過緊張就真係緊張，比賽同平時商演完全唔同，對細節要求高太多。」而這次參賽，也讓他重新拾起放下多年的唱歌興趣：「原來我仲有呢團火，去到呢個年紀仲可以大膽玩一次，呢個機會真係意料之外。」
今次比賽以蒙面形式登場，周志康話，戴住「企鵝人」面具演出，除了神秘感，更多的是一種孤獨感，整個過程更是有驚無險。「戴住面具個空間感好孤獨，全程要不停同自己打氣，叫自己冷靜，個心一直砰砰跳。頭幾次參賽仲接連遇咗唔少意外，第一次唱《Touch》嗰陣，前一位出場嘅葉凱茵當時發揮有少少失準，分數唔太理想，之後佢喺台上講關於家庭嘅事，我聽到都好感動，眼淚直接就出嚟。當刻我即刻知大鑊，下一個就輪到我，比賽絕對唔可以喊住出場，即刻衝出去冷靜下，擦乾眼淚先再準備上台。」
誰知波折陸續有來，佢剛開口唱第一句，就因為後台技術問題被逼叫停，要返回後台重新等待；第二次準備就緒再上台，唱到一半又突然「砰」一聲，後面嘅道具直接跌咗落來。「當下我淨係知道一定要繼續唱，就算有唔同因素干擾都唔可以停。如果係當年剛入行嘅我，遇到呢啲事一定會手足無措、心態全亂，但多咗咁多年嘅演藝歷練，先可以鎮定應對落來，而家回頭諗，呢件事都幾得意。」
兩次出場都斬獲5燈滿分的好成績，周志康話，觀眾的認同，是今次參賽最大的意外收穫。「頭兩次表現都攞到滿分，真係好開心，證明努力冇白費。藝術呢樣嘢，所有東西都係靠累積，際遇、年紀，甚至我講嘅每一句說話，都係靠以前嘅歷練，先成就而家嘅我。但有歷練唔代表一定有人認同，呢行好多時就算你付出咗，表演都未必有人受落，甚至會鑽牛角尖。所以今次播出之後，有咁多觀眾認同我，真係意料之外的驚喜，內心充滿感恩。觀眾絕對有權利唔鍾意你唱歌，所以我揀嘅歌、我嘅演繹方式有人鍾意，就係我最開心的事。」
由當初的歌唱比賽新人，到後來轉型做演員，結婚生仔成為兩個女兒的爸爸，周志康坦言，呢十幾年來從來冇真正放低過歌手夢，當中亦不乏挫敗的時刻。「當初入行，我本身係想做歌手，但每一間公司都有資源分配，冇理由個個都捧。我亦唔覺得自己行黑運，公司其實都畀過機會我，只係自己冇把握好。當年19歲參加比賽，每一步都係行一步睇一步，根本冇時間去想清楚前路，但而家36歲，一定要諗得好明白，要將自己儲咗咁多年的力氣，喺合適的時候釋放出來，而家就係最好的時機。」
入行多年，難免有失意、覺得挫敗的時候，周志康卻有一套自己的調整心法。「有時都會覺得，自己做的事好似愈來愈差，位置愈來愈唔理想，但我好識得安慰自己：就算市道再差，我仲有工開，已經比好多人幸運。就算工作未必事事如意，甚至有挫敗感，但至少我有美滿的家庭，兩個女兒咁乖，呢樣嘢已經好難得。一路以來都有好多小確幸，陪住我一步一步行過來。」
2014年，周志康與太太拉埋天窗，婚後先後誕下大女Emma同細女Elva，如今一家四口其樂融融。講到兩個寶貝女兒，周志康眼入面滿是溫柔：「佢哋唔係我向前衝的燃料，但係我努力的最終目標。照顧家庭要付出好多心機，要安撫太太、照顧女兒，呢個過程入面，我都收穫咗滿滿的快樂，會不停提醒自己，到底係為咗乜去搏。佢哋對我來講太重要，我所有的努力，都係為咗同佢哋一齊分享成果。」
對他來說，家庭永遠是最好的充電站。「好多時候早收工，一開門，兩個女就會叫住Daddy衝過來，一日的辛苦即刻就煙消雲散。有時夜收工返屋企，見到屋企仲有燈亮住，個心就會好雀躍，因為可以同女兒傾下計。而家女兒有時唔捨得訓，就係為咗等我返屋企同佢哋講幾句說話，呢啲時刻絕對係最好的精神食糧。某程度上，家庭會令我忘記所有工作上的不如意，開心的事留返同屋企人分享，唔開心的事就盡量忘記。」
拍劇多年，周志康演過不少反派、奸角，入型入格的演出令觀眾印象深刻，但現實中的他，卻是個不折不扣的顧家暖男。「有時觀眾只會睇到你熒幕前的一面，睇唔到你背後的樣子。我演過好多唔係咁正面的角色，剛好觀眾睇完，就會覺得呢個人好似唔太討好，對我有誤解。但我覺得，認識一個人要從好多方面去睇，甚至傾過計之後，印象就會完全唔同。所以都希望藉住呢個訪問、今次參賽的機會，令觀眾可以重新認識周志康，了解到真實的我到底係點樣。」
一路走來，周志康最感激的，始終是默默陪伴在側的太太。「我太太絕對係我最大的支持，佢將屋企打點得妥妥當當。由當初認識的後生女，到結婚生仔成為兩個女的媽媽，佢改變真係好大，變得好識得照顧人，而我就一直被佢照顧住。有時見到佢湊小朋友湊到好煩躁、好辛苦，我就會盡力去安撫佢的情緒，自己可以做的就盡量做，對佢好本來就係我應該做的事。我太太真係好好，身邊朋友都話，佢結婚之後真係成長咗好多，或者就係所謂的為母則強，佢各方面都令我好安心。如果冇佢，我根本冇可能係呢個圈行咁耐，始終生活本來就唔容易，何況娛樂圈呢條路向來都唔會一帆風順。太太，就係個個令我可以毫無後顧之憂、放心向前衝的人。」TVB
