鄭子誠憂AI搶聲藝飯碗 IG玩潮文洗脫「奸人」形象.香港電台第二台四月推出多個全新節目，昨日（1號）舉行「四月迎新日」聽眾見面會。劉倩怡主持嘅全新寵物節目《有尾相伴》即將登場，佢同老公鄭子誠專登帶住四隻愛犬多多、小初、歡歡、心心現身撐場，夫妻仲喺台上大方放閃。
主持小馬當場搞笑問鄭子誠，屋企係唔係養咗「老虎」，暗指老婆係「老虎乸」。鄭子誠即時甜到漏咁回應：「邊度有！老虎獅子我都冇養，不過溫馴、善良、識得諗人、好似羊咁溫柔嘅，我就養咗個。」搞到劉倩怡面紅害羞，之後鄭子誠仲扮狗狗氹老婆，難怪結婚多年感情依然咁好。
劉倩怡話新節目會邀請寵主分享照顧毛孩日常同難忘經歷，亦會請獸醫上節目講寵物醫療資訊。鄭子誠就話今次純粹撐太太，帶四隻狗出嚟見世面：「我哋養咗四隻，三隻老狗一隻後生，有寵物節目梗係要帶佢哋亮相啦。佢哋喺屋企好百厭，出到嚟反而好乖，應該未適應大場面。」四隻狗狗台上都好聽話，完全冇失控。
近排鄭子誠喺IG不斷試新花樣，拍Reels玩年輕人挑戰，讀潮文、卡通配音、小劇場、八拍遊戲樣樣齊，流量同反應都超好。佢話：「我想同聽眾拉近啲距離，唔想淨係生存。舊一代聽眾識我，但年輕人覺得我係咩人？係咪永遠都係嗰個奸人？」所以佢專登搵三位年輕人幫手打理社交平台，由佢哋諗橋，自己負責演繹，效果出奇地好。
鄭子誠話一開始成日否決佢哋嘅點子：「初頭佢哋畀嘢我睇，我全部Ban曬，覺得好白痴，邏輯又唔通。但後來諗清楚，既然搵人幫手就要信佢哋，唔好用自己舊思想去限制，結果出街反應好好。」早前佢用專業VO聲讀網上經典「城市大學」潮文，IG勁吸近四萬Like，網民大讚係Hermes級質素，足球員顏卓彬仲話要用呢段做鬧鐘。鄭子誠笑言：「我一開始都唔知點解要幫城大宣傳，佢哋叫我讀我就讀，點知反應咁有趣。」
被問到依家多咗搞笑形象，工作機會會唔會多咗，鄭子誠話查詢的確多咗，暫時未正式落實，不過已有年輕服裝品牌主動接洽合作。太太劉倩怡亦非常支持：「佢用奸詐個樣去問人「你好嗎」、「生仔未」，超好笑，呢行就係要大膽試。」
講到近年AI盛行，自己把聲被複製用落廣告、時事評同股票分析片，鄭子誠就大感憂慮，擔心AI搶晒聲藝同行飯碗。佢話：「好難防止AI複製聲音，但新入行DJ同配音員出路何在？如果乜都畀AI做，佢哋就冇生存空間。真人講嘢同AI完全唔同，溫度同感情高好多。AI只係輔助，唔可以乜都晒畀佢做。」
見到而家大品牌紛紛用AI製作廣告，唔再請真人模特兒，鄭子誠直言前景一時間的確好悲觀：「而家成個風潮都追捧AI，但遲早會物極必反，我相信觀眾遲早會想睇返真人、聽返真人把聲。」TVB
