節目巡禮︱林夏薇新劇延播 自覺爭視后高手如雲. 視后林夏薇今日（29日）出席《2026 TVB年中節目巡禮》。佢透露早前返鄉下廈門舉行音樂會，仲獲邀為足球比賽擔任開場嘉賓唱歌，更榮升旅遊大使，向外界推廣家鄉文化。問到會唔會為此拍旅遊節目，薇薇話如果有機會一定會出一分力，又話好耐冇返家鄉，今次返去見識到唔少新建設，仲趁機品嘗兒時美食。
薇薇話今次主要宣傳新劇《玫瑰戰爭》，指角色好有發揮，好期待可以再次同楊茜堯合作。提到有指劇集原定今個月20號播出但結果延期，佢坦言自己都係睇網上消息，笑言演員有時比觀眾更遲知道。問到延遲播出更加接近年底頒獎禮係咪有利爭獎，佢話：「以前大家係會咁樣覺得，但今年高手雲集，套套劇都好優秀，有佘詩曼、袁詠儀、蔡少芬，全部都係影后視后。（你都係！）我係後輩，哈哈！所以無論擺喺邊個月播都係咁激烈。」佢話暫時未有入劇組安排，自己為生意都忙個不停周圍飛。TVB
