歌手2026首期淘汰賽果出爐：齊豫奪冠庾澄慶包尾被淘汰 竇靖童唱竇唯王菲經典排名第四. 《歌手2026》首期賽果今晚（22日）出爐，齊豫憑經典金曲奪得第一名，尤長靖緊隨其後得第二，胡彥斌排第三，竇靖童以改編父親竇唯作品《Don't break my heart》獲得第四名。至於65歲嘅庾澄慶則排名第九，成為首位被淘汰嘅歌手。
今季《歌手》改革賽制，推出全新月度聯賽制，以月為單位進行淘汰，月度排名後五位嘅選手將會被淘汰，前四名則晉級下一輪。首場比賽出場順序由特邀串講人那英「抽波」決定，首位出場嘅魏如萱演唱《末路狂花》，網友評價「曲風怪但夠穩」。壓軸出場嘅庾澄慶以成名作《讓我一次愛個夠》應戰，但最終只能排第九出局。佢喺備采中透露，65歲仍參賽係受張學友影響：「我從來沒想過退休，只要能唱就會一直唱。」
竇靖童首次登上《歌手》舞台，選擇改編父親竇唯喺黑豹樂隊時期嘅經典作品《Don't break my heart》（王菲亦曾翻唱）。佢喺備采中坦承，出道十年仍會緊張，曾經好想擺脫父母標籤證明自己，但29歲嘅佢已唔再被呢個命題困擾。當晚佢嘅演繹兼具王菲嘅聲線同竇唯嘅搖滾勁，令那英感動到標淚，上台時連咪都唔記得拎，感嘆：「一代人終究老去，包括我和她媽！」胡彥斌當晚第五位出場，以代表作《你要的全拿走》炸裂全場，佢更預告如果要請陶喆做嘉賓，必須要入到總決賽先。
歌手排名窦靖童 王菲的声音唱窦唯歌手2026庾澄庆淘汰
