新劇拍攝資訊丨《模範律師團》六月開拍，主演：陳煒、羅嘉良、張曦雯、劉佩玥
新聞稿：無綫將開拍《正義女神》前傳《模範律師團》，以陳煒的角色為主軸，揭開她如何煉成「高淑樺」及成為人母的神秘過去，除了有多宗法庭案件作為單元外，還會穿插律師為爭奪首席律師之位的明爭暗鬥，戰場從《正》劇的少年法庭轉至成人法庭。現時劇本創作得如火如荼，暫定6月開拍。
選角方面，今次女主角是陳煒，《正》劇大部分角色不會登場，改由無綫兩大好戲花旦張曦雯（Kelly）及劉佩玥（Moon）上陣。另外，「3屆視帝」羅嘉良亦在洽談中，隨時坐鎮添戲勢！陳煒接受東網訪問時對新劇所有細節守口如瓶，只表示：「點解收風收得咁勁，所有嘢係保密階段，留待官方公布啦！」
正在休假的Kelly坦言要開始為新劇做準備：「嚟緊要同佳導（鍾澍佳）開會，聽故事。」她稱一直有追看《正》劇，對有份拍攝前傳大感開心：「我好鍾意煒哥（陳煒）劇中嘅角色，最近同佢喺《璀璨之城》合作過，好期待再合作。（你有冇演過律師？）我喺《踩過界II》演過，好鍾意演律師，今次可以再演，好期待！相信台詞難唔到我，我鍾意演專業人士，之前演醫生都多台詞，所以演律師應該冇問題。」
至於Moon透露暫時對新劇了解甚少：「我忙完5月2日佛山個音樂會就準備迎接新劇。雖然未知角色同劇情，但係知道個故事係關於律師，我好期待，希望可以做得更好，有更大突破。」她表示有飾演律師的經驗：「我拍第一套劇《四個女仔三個BAR》就係做見習律師，喺《巨塔之后》係飾演一個專打醫療事故嘅律師，我覺得自己同呢個題材、呢個職業幾有緣分，哈哈！」她又表示以前跟Kelly在《俠醫》有不少對手戲，跟陳煒就相反：「每次同煒哥拍同一部劇都唔多對手戲，如果今次多啲場口可以一齊玩就好啦！因為我超級鍾意煒哥，一見到佢就會心心眼！佢對我哋真係勁好，好好人又好好玩，工作時好認真。」
撈家昨日接受東網訪問時直認不諱：「呢套劇係傾緊嘅，希望成功啦！我都好耐冇同鍾澍佳合作，以前同佢合作過《難兄難弟》。」問到「出山」有何要求？他笑言除了要有好劇本外，最緊要拍得開心：「見番啲朋友嘛，好多謝阿佳搵我，佢係一個非常好嘅監製，人品好好。」
TVB TVB
