陳瀅專訪｜自爆《臥底嬌娃》非角色首選 大讚鍾柔美跳舞天賦驚人.熱播劇《臥底嬌娃》中，陳瀅（Jeannie）飾演剛烈硬朗的女臥底，偽裝成女團成員潛伏調查，係劇中的「動作擔當」，同張曦雯、羅毓儀組成的女團組合反差感十足，帶來連場笑料。日前Jeannie接受專訪，大談拍攝歷程，仲自爆自己並非呢個角色的首選人選。
談到今次女團主題的拍攝體驗，Jeannie同張曦雯的感受完全相反，直言全程都非常享受：「我細個讀小學、中學嗰陣，唔係成日有校內表演㗎咩？我係會自己舉手要參加演出嗰類人，但一定會拉幾個朋友一齊上台。所以我都懷疑，自己細個已經有想做女團嘅心願，只不過最後做咗演員。今次呢個機會真係好難得，可以同成班女仔一齊受訓、一齊努力，成個過程我覺得好享受、好興奮。始終唔係直播，可以預先排練、排舞，壓力冇咁大。」
講到當初接到呢個角色的契機，Jeannie毫不避諱自爆：「我仲專登問過監製，我根本唔係呢個角色嘅首選！首選嘅女演員仲係我好朋友，所以我接到角色嘅時候，仲專登打俾佢，話我接咗呢個棒。」佢坦言，見到兩位拍檔之後，都有擔心自己唔適合呢個角色：「因為原先嘅角色設定，由我去演可能會有少少難度，所以初期我都有不停調整，諗住點樣配合得好啲。而家由我哋三個演，出嚟有另一種感覺，我自己都好享受。」至於原先的首選人選，Jeannie就賣關子表示遲啲再同大家公開。
講到同兩位拍檔組女團的第一印象，Jeannie笑言第一個諗法就係身高差：「我唔係擔心Yuki，係發覺喺Kelly隔離做戲，真係要著高啲嘅鞋先好睇，唔係畫面入面就會好凹凸不平。Kelly喺劇入面成日都著高踭鞋，但佢拍攝嘅時候超好人，成日主動換平底鞋遷就我，哈哈！我哋三個嘅身高，簡直就係Do、Re、Mi，出嚟嘅效果仲好得意、好可愛。」
今次Jeannie飾演的角色，係劇中的「動作擔當」，要用剛烈硬朗的身手包裝歌舞表演，表情仲要成日木木哋，完全冇情緒價值。談到角色的演繹，佢話：「好似Kelly嗰啲好有女人味嘅柔軟動作，我就會做到似打功夫一樣，硬掹掹咁去跳，我覺得呢個反差都幾有趣。當Kelly喺隔離好有女人味咁跳舞，我就喺隔離似準備去打架一樣，但又要做女團嘅動作，本身呢個角色設定就好特別。」
劇中仲有同歌手出身的鍾柔美合作，Jeannie大讚對方的跳舞天賦：「柔美嗰陣真係好忙，一邊要讀書一邊要兼顧工作，所以排舞嘅時間冇我哋咁多，好難先抽到空過嚟排。我哋可能已經排咗兩三個鐘，佢過來睇一陣、練15分鐘，就已經追到我哋嘅進度，真係好大分別！」佢仲笑言，劇中有一場輪椅舞，估計編劇係怕柔美跳得太出色，先叫佢坐住跳，唔會搶咗三人的風頭：「但佢就算坐輪椅都冇輸，推輪椅都推得超有型！」
至於劇中的跳唱成品，Jeannie就表示非常有信心：「我已經聽過團歌喇，聽得出有好多後期調音，相信冇太大問題。至於跳舞，我哋都用咗好多時間去練，應該都見得下人，都有信心嘅。」TVB
