謝君豪苦等34年終封劇帝：魔咒終於解除！彭秀慧相隔18年再奪最佳女主角.第34屆香港舞台劇獎頒獎禮前晚圓滿舉行，謝君豪憑《天下第一樓》首奪最佳男主角（悲劇／正劇），結束長達34年嘅等待。佢喺台上從蘇玉華手中接過獎座時感觸話：「由第一日開始聚餐頒到現在，呢個魔咒一直綑綁我34年，今日終於解除！」謝君豪自第2屆開始多次入圍，曾以《南海十三郎》爭獎都落敗，今次終於一償心願。佢透露6月會參演《魔幻時刻》，笑言希望下屆能拎埋喜劇組劇帝。
彭秀慧繼2008年憑《再見不再見》奪最佳女主角（喜劇／鬧劇）後，相隔18年再憑《亞娜2.0》成為最佳女主角（悲劇／正劇）。佢話今次懷住輕鬆心情出席，最開心係得獎作品同風車草劇團合作，別具意義。卓韻芝則憑《我無醉》獲得最佳女主角（喜劇／鬧劇）。
黃智雯失落最佳女主角（悲劇／正劇），但話有提名已好開心，6月會演出新舞台劇，首度反串，同梁雍婷飾演夫婦。MIRROR成員楊樂文首次獲提名最佳男主角（喜劇／鬧劇）未能獲獎，佢話勝敗乃兵家常事，唔會失望，反而係動力。
黃秋生多年冇參與香港舞台劇獎，但今次提名最佳男配角（喜劇／鬧劇）未能得獎。佢話「香港不會有（舞台劇演出）啦」，透露準備去英國做棟篤笑，又話唔會再喺香港工作，只會畫畫食飯。對於會否再拍香港電影，佢話：「想拍都冇得拍，有機會先算，隨緣啦！」
