【On.cc】敖嘉年睇唔到楊思琦被欺凌 阮政峰拍《愛．回家》被導演趕走
歌手林奕匡、藝人阮政峰、敖嘉年、朱智賢等，今日（28日）在大角咀出席HOY「第20屆愛知•名古屋亞運會」啟動禮。林奕匡將會與劍擊運動員蔡俊彥（Ryan）合唱亞運節目主題曲。林奕匡指歌曲正在創作中，希望能為運動員打氣，問到Ryan可有給予意見？他說：「冇，因為之前寫過歌畀佢，所以都知道佢嘅聲線特質。」
林奕匡一家三口到韓國旅行，首次帶仔去旅行的他，指小朋友出門當然有扭計，但已經比預期中好，他說：「有時想幫老婆抱囝囝，但囝囝Say No ，因為之前嘢，幾個禮拜冇見佢，不過，今次旅程之後都挽回囝囝少少歡心。」
阮政峰、敖嘉年、朱智賢接受訪問，阮政峰屬處境劇《愛•回家之開心速遞》的元組演員，問到《愛‧回家》將停播可感可惜？他說：「又冇呢個感覺，反而感恩，自己覺得一直好似冇乜大成就，但係啲網民話細細個就睇你，原來我呢14年係佢哋嘅童年回憶。（無綫有冇搵你返去客串？）未收到通知，如果公司邀請，冇錢都返去，還觀眾心願。」
楊思琦在節目中講到當年拍攝劇集《翻叮一族》被集體欺凌，商天娥被爆是帶頭欺凌的嫌疑人物，事件成為網上熱話。當年有份拍攝劇集的敖嘉年被問到可由看見楊思琦被欺凌？他說：「咁誇張嘅事，講真我真係睇唔到，定係發生咗我唔知，因為嗰陣係新人，自己都好多嘢要留意。（有冇見過楊思琦喊？）又冇，同佢拍過3套劇，做嘢都正正常常。（有冇見佢畀人杯葛？）可能我睇唔到。（你有冇畀商天娥鬧過？）咁又冇，反而佢有教我做戲，可能我醒目，會買啲嘢畀佢食。」
講到拍攝被前輩鬧，阮政峰自爆曾被導演趕出廠：「嗰陣係新人，拍緊《愛‧回家之八時入席》，畀導演㩒咪，阮政峰你同我出廠，走！因為我太努力，導演話每個鏡頭都見到我。」朱智賢則慶幸未有遇過兇惡的前輩，反而要多謝陳豪的溫馨提示，她說：「嗰陣係新人，有時會遮咗佢燈，佢就用眼神、動作去提示我，當我小朋友咁教，好彩冇遇過好惡嘅前輩。」
林奕匡希望新歌能為運動員打氣。
朱智賢慶幸未有遇過兇惡的前輩。
敖嘉年話當年睇唔到楊思琦被欺凌。
阮政峰自爆拍《愛•回家》被導演趕出廠。
嚟張大合照。
