【On.cc】《愛．回家》「張龍」離巢近兩周已轉行 攻金融醫療界
無綫處境劇《愛．回家之開心速遞》「張龍」黃耀煌，本月中宣布離巢，佢同Rebecca（沈可欣飾）於劇中相差12年組姊弟戀CP，成功入屋，如今其角色已離開《愛．回家》，佢本人亦已立即轉行，喺離巢不足兩周，就表示已成白領精英，非常快手。
「張龍」黃耀煌離巢不足兩周，已經搵到工。
黃耀煌依家做白領，去公幹都可以忙裏偷閒。
黃耀煌分享穿恤衫西裝、戴金絲眼鏡靚相，透露要飛內地開會：「高強度的會議後，更懂得江湖菜的風味。重慶，下回再戰！BusinessTrip」只見黃耀煌升降機內自拍，又忙裏偷閒同同事捉棋，生活絕對充實。黃耀煌指自己多年嚟由始至終都只係普通「打工仔」，依家轉做文職，黃耀煌表示好忙碌，因為要重新認識其他行業，之後會繼續讀書進修，目前正積極學習，跨界了解金融與醫療板塊新知識，仲已經準備好迎接新挑戰。
黃耀煌離巢時間撞正《愛．回家》宣布即將停播，佢否認一早收到內幕消息，只係剛好合約到期，想嘗試跳出舒適圈。黃耀煌自言對《愛．回家》感不捨，能夠演出「張龍」一角都好感恩，對於未來會否到拍劇？黃耀煌表示如果時間可以配合，會繼續參與幕前演出，自己都等緊好劇本，正考慮拍攝日常短片，同網民保持互動。
黃耀煌一身西裝Look，同佢平時劇入面造型都幾似。
依家佢積極攻金融與醫療板塊。
黃耀煌雖然轉行，但都會繼續接劇本。
