【On.cc】《執法者們》揚威「紐約電視電影節」 勇奪「串流犯罪劇集組別優異獎」
邵氏兄弟與內地影視平台聯合製作之劇集《執法者們》去年在內地首播，就已刷下超過4億播放量之佳績，其後在無綫播出，以最高收視23.3（150萬觀眾）成為年度兩線劇集收視冠軍，在全球廣播及影視創意界享有高度聲譽的年度國際盛事「2026紐約電視電影節」剛公布的得獎名單中，《執法者們》憑藉卓越的製作水準與扣人心弦的劇情，勇奪「串流犯罪劇集組別優異獎」（Finalist Diploma - Streaming Crime Drama）。
黃宗澤實力擔當。
作為本屆影視節的焦點之一，《執法者們》由黃宗澤、馬國明、陳豪、吳啟華等多位實力派視帝級人馬，以及宣萱、蔡潔、陳瀅等領銜主演。男主角之Bosco得悉劇集能夠揚威海外得獎，感到特別開心：「始終呢套劇真係拍得好辛苦，要咁大量嘅打戲，又要去到咁遠嘅鑽油台拍外景，一大班工作人員一齊去捱過呢個拍攝，攞到個獎唔止我開心，我都戥攝影師、導演同所有工作人員開心呀，因為大家都真係搏咗條命去拍，雖然好多打戲好辛苦，咁嗰陣時梗係要呻辛苦啦係咪先，要向樂小姐（邵氏高層樂易玲）詐吓嬌㗎嘛，拍得咁辛苦，依家有咁好成績，上年收視咁好，依家又攞到獎，真係乜都抵返晒啦。」
提到他今年攞獎運極旺，Bosco竟然有點擔心：「哎呀！真好大壓力呀，之後都唔知攞唔攞到獎添，哈…都係講笑啦，咁希望梗係拍多啲更好作品，拍多啲更好戲啦，即係畀更多娛樂觀眾啦，攞更加多獎更加好啦！」
Bosco一直以拍港劇為主，原來對港劇有情意結：「我始終係香港長大嘅，咁梗係拍港劇就最開心啦，因為真係港劇養大我㗎嘛，如果可以同內地劇集或者電影方面有更多合作呢就更加好啦，因為都想學多啲唔同人唔同地方嘅拍攝方法或者佢哋嘅知識。」
至於該劇女主角之一蔡潔，對於劇集得獎感到十分興奮：「真係好榮幸呀，好興奮知道呢個得獎嘅消息，係一分屬於我哋成個團隊嘅榮耀，好多謝亦都好感恩，自《執法者們》播出以來一直都收穫咗好多觀眾朋友嘅喜愛，大家對於『何天茹』同埋『周俊傑』（Bosco）呢段（波菜CP）感情嘅追看，令到成佢哋呢一段關係同故事更加圓滿，期待日後可以繼續做多啲好嘅作品送畀觀眾。」另一位劇中女主角陳瀅，在戲中有大尺度演出，而演技更令人眼前一亮，對於劇集得獎她覺得十分開心，為台前幕後辛苦付出終有回報感到安慰。
黃宗澤與蔡潔演活角色。
陳瀅演技精湛。
蔡潔超水準演出。
