78歲石修戴助聽器現身《一周星星》 自揭聽力僅剩六成：打鼓吹色士風累事.藝人石修日前同米雪、阮兆祥一齊擔任《一周星星》節目嘉賓，節目播出後，有網民發現石修右耳佩戴咗助聽器，隨即引起熱議。原來現年78歲嘅石修近年飽受聽力退化困擾，目前聽力僅剩六成。
童星出身嘅石修從影超過60年，熱愛音樂嘅佢經常表演，但早年登台時發現自己聽唔清楚聲音，經醫生診斷後發現聽力只剩六成。石修透露，聽覺受損嘅原因係同佢成日戴住耳機聽音樂、打鼓同吹色士風有關。喺長期高分貝環境下，雙耳聽力終告受損。佢無奈話當年身邊好友勸佢保護聽覺，可惜佢冇理會，如今深感後悔，𠵱家無論幕前定日常生活都要靠助聽器。
為咗喺鏡頭前維持專業演出同有型形象，石修曾經豪擲逾5萬元配備一對隱形式助聽器，需要根據耳蝸形狀訂造，體積極細。佢仲特別備有多套唔同款式顏色嘅助聽器，方便配襯唔同場合嘅服裝。
除咗聽力問題，石修過去亦曾走過鬼門關。80年代拍《楊門女將》前，佢患上消化系統怪病3年，胃部突然失去消化能力，一個月內體重由150磅跌至105磅，行路都冇力。幸好當時得鄭少秋（秋官）相助，介紹太極師傅，仲每日清晨6點帶佢去打太極，先奇蹟康復。
