陳曉華親解「一年微調3次」傳聞 強調冇容貌焦慮：心態先係變美終極武器.TVB當家花旦陳曉華（Hera）近期備受力捧，人氣高企，最新一期《東周刊》獨家爆佢為咗保住女主角光環，一年內進行多達3次醫美微調，提升美貌同自信。面對外界熱議，Hera透過短訊向《星島頭條》大方回應，強調自己絕對冇容貌焦慮，仲話更睇重內在修養：「多謝大家關心，我對自己嘅五官冇任何焦慮，反而更注重身體同心理健康。外表美麗絕對唔代表我嘅一切，所以我更加注重內在美，其實大家都好靚！」
被問到有冇覺得自己未夠完美，或者想透過醫美加強邊個部位，Hera展現滿滿正能量，坦言心態先至係變美終極武器：「更重要嘅係身體同心理健康美麗，先可以令到自己發光發亮。如果自己從來都唔識欣賞自己，無論整容定未整，都唔會達到自己滿意嘅效果。真正令到自己變得美麗發光發亮，其實係自己嘅心態，所以我鼓勵大家花時間精力去養好自己嘅心態！」佢同時大方分享保養秘訣，主要靠食多啲生果、勤做運動同埋忘記唔開心嘅事，仲溫柔呼籲大家：「唔好俾咁大壓力自己，唔好因為樣貌而焦慮，因為除咗外貌，我哋仲有好多優點值得大家留意。」
Hera過去曾擔任美容診所代言人，難免令人猜測佢對醫美接受程度較高。對此，佢特別交代目前合約狀況，仲藉機公開招募新合作：「我係再冇任何美容院嘅代言，歡迎任何想搵代言人嘅商家來電洽談。」展現自信積極一面。TVB
