林鈺洧持建造業安全牌照 自封現實版羅拉：我好大力，應唔應該續證？.林鈺洧（Denice）憑處境劇《愛．回家之開心速遞》中「羅拉」一角成功入屋，劇中不時落手落腳搬貨，被形容為現實版羅拉。原來戲外嘅佢同樣「打得又捱得」，日前佢喺社交網晒出一張「建造業安全訓練證明書」，自爆持有正式嘅地盤安全牌照。
呢張證明書相信係Denice早年為拍攝TVB節目《不可能任務》，親身體驗地盤紮鐵、釘板、落石屎等工作時考取嘅安全資格。不過牌照就嚟到期，佢發文同粉絲互動：「在劇集裡做羅拉，現實中……我都係羅拉。戲內戲外，一樣咁鍾意落手落腳，其實我好大力💪🏻6月20號牌照到期了，應唔應該renew呢？」帖文一出，引來大批網民留言，有人大讚佢「估唔到咁勁」、「犀利」，更多人當然投「贊成票」，話「一定要續」、「呢個牌照好有型，唔好浪費」。睇嚟大家都好期待呢位「地盤羅拉」繼續持證上陣。TVB
