視帝馬國明嘅愛妻湯洛雯（靚湯）尋日（6日）正日39歲生日，於社交網上載大批慶生照，當中就見到老公馬國明、索爆細妹湯樂瑤（Cassandre）、「2Line黨」成員朱千雪、岑杏賢及蔣家旻等為佢歡樂慶生，連佢自己都話過咗個好精彩嘅生日周！靚湯留言：「充滿愛、歡笑和美食的精彩一周❣️感謝我所有親愛的家人和朋友，以及你們發來的所有信息🫶🏻」見合照中，靚湯以淺色恤衫同着黑色恤衫嘅馬國明頭貼頭合照，明顯夾晒情侶裝，加上佢手捧大紮鮮花，幸福模樣令人羨慕。佢又上載一張同妹妹湯樂瑤合照，見佢着上同一套衫，似乎阿妹係做「電燈膽」Join埋食生日飯，感情極好。
