寒戰1994｜上映3日票房衝擊1500萬 吳彥祖郭富城劉俊謙齊晒舊照洗版造勢.香港史上最賣座、兩集累積票房破億嘅警匪鉅作《寒戰》系列，前傳《寒戰1994》已於5月1日強勢上映。電影開畫首日即衝破600萬票房大關，打破《寒戰》及《寒戰2》嘅開畫紀錄，截至5月3日，上映首3天累積總票房已火速衝擊1500萬，氣勢勢不可擋。
戲中商界潘氏家族嘅豪門恩怨成為焦點，謝君豪飾演嘅香港首富潘雋亨同飾演其長子潘志昂嘅吳慷仁之間嘅父子對立，令觀眾津津樂道。電影今日釋出「潘氏父子」幕後花絮，曝光謝君豪連環狠摑吳慷仁、怒斥佢「畜生不如」嘅震撼場口。謝君豪話第一下打落去好響，雖然冇忍手，但好怕打到對方耳仔驚佢會聾。專業嘅吳慷仁拍完後要敷冰，笑言「收音師應該好鍾意呢下聲」，然後馬上進入狀態拍第二Take。呢場戲謝君豪前後一共掌摑咗吳慷仁十幾巴，展現極致專業精神。導演嗌Cut後，兩位影帝情緒依然激動，要抹眼淚同相擁平伏，盡顯父子情深。謝君豪為演活比真實年紀大嘅角色，每次拍攝前後要花兩個幾鐘上妝落妝，戴頭套、蓋人造皮膚，化妝師細緻到連頸紋都唔放過，逼真到連廖子妤都一度誤會佢嘅真實耳朵都係假體。
為配合宣傳，一眾演員連日來喺社交平台晒出自己1994年嘅珍貴舊照，掀起全網懷舊熱潮。劉俊謙上載拎住劍嘅威武童年照，獲讚「母胎男神」；廖子妤分享紮起粉紅頭箍、一臉嚴肅嘅童年照，自嘲「嬲爆」；吳彥祖、郭富城嘅舊照獲網民激讚帥氣；謝君豪一張坐喺階梯上、充滿憂鬱文藝氣息嘅30出頭舊照令網民驚艷；高海寧分享7歲時同媽媽嘅合照，水汪汪大眼同標緻五官獲讚「最強基因」。其他演員包括王丹妮、陳以文、何啟華等都紛紛上載舊照，引起網絡熱話。
