東張+丨東區警區反黑拉18人 14歲少年收36.6元「老毛」利是 招攬同學入會.東區警區刑事部聯同特別職務隊喺今個月13同14號，一連兩日展開大規模反三合會執法行動，主要打擊黑社會活動同截斷佢哋嘅收入來源。行動期間，警方喺全港多區總共拘捕咗18名男女，年齡由14歲到57歲，當中包括兩名內地人。班被捕人士分別涉嫌洗黑錢、經營賭檔、刑事恐嚇同煽惑他人成為三合會會員等罪名，部分人有黑社會背景或者涉及相關刑事案件。
調查發現，一個活躍喺東區嘅黑社會團夥，由舊年年底開始，喺北角一個住宅單位租場經營非法釣魚機賭檔。警方突擊搜查嘅時候，檢獲咗7部釣魚遊戲機同一啲現金。之後喺團夥頭目嘅女朋友屋企，再搜出大批金器、首飾同名牌手袋，懷疑有人用犯罪得益買奢侈品嚟洗黑錢。警方同時發現，個頭目涉嫌喺過去四年，利用自己嘅銀行戶口清洗高達一千萬嘅非法收益。
除咗經營賭博場所，呢個團夥仲用1000蚊報酬，利誘賭客提供私人銀行戶口，仲將帳號貼喺賭檔當眼位置，用嚟收取非法賭款。
另外，警方喺行動中特別關注黑社會滲透校園嘅情況。被捕人士入面有一個只得14歲嘅黑社會成員，佢涉嫌喺學校招攬同威逼朋友、同學加入組織，仲進行簡單嘅入會儀式，包括收咗一封金額係36.6元嘅「老毛」利是。警方相信，今次收網行動成功打擊咗呢個黑社會團夥嘅經濟命脈，同時有效防止相關罪案繼續蔓延。香港14岁男学生成黑社会骨干 香港警方发现青少年自称黑社会港警通报14岁学生涉黑诱骗同学入会
