農夫疑正式離巢！官網被除名轉戰內地 《愛回家》多角齊齊走.TVB呢排又傳出新一輪離巢潮，最令人震驚嘅一定係金牌搞笑組合農夫（陸永同C君）！有眼利網民發現，佢哋兩個嘅藝人資料已經喺TVB官網消失，意味住佢哋可能正式結束同無綫多年嘅賓主關係，全力向外闖。
其實農夫早喺舊年已經自己開咗間娛樂公司「農作天下（So Fa So Cool）」，升呢做老闆，加上佢哋由2022年開始已經將重心轉向內地，仲搞咗好多場《農夫20周年有D新歌巡迴演唱會》，場場爆滿，似乎一早鋪定路離巢。
農夫同TVB2013年簽約，做部頭合約藝員之後，由歌手成功轉型做電視主持，同Do姐鄭裕玲合作無間，好似《Do姐去Shopping》、《晚間看地球》、《Do姐有問題》等等，農夫轉數快又夠幽默，配埋Do姐嘅霸氣，火花四濺，成為收視保證，亦係唔少觀眾嘅爆笑回憶。C君仲喺2021年做過J2台創意總監，幫手改革節目，2023年先功成身退。
除咗農夫，呢波離巢潮仲波及到處境劇《愛回家之開心速遞》。有網民發現劇中幾個要角同綠葉演員嘅資料都喺官網下架，包括已故武打影星孟海嘅姪女、飾演「Laptop」嘅孟希璘；飾演「大力」、曾參演《金枝慾孽》嘅資深綠葉王張漢斌（現名張韡騰）；仲有2017年加盟、喺《女神配對計劃》向李芷晴表白嘅周嘉全。
TVB
