访问丨李海銅劇接劇入行三年進入收成期 公開感情狀況拒上《女神2》.TVB新晉小花李海銅（Nina）近年劇接劇無停手，先後憑《新聞女王2》等多套熱播劇成功入屋，入行短短三年終於迎來作品大爆發的收成期。近日李海銅受訪，大方分享拍劇幕後點滴，仲首度開腔公開感情狀況，直認入行至今一直保持單身，更堅稱就算遇到心儀對象都絕對不會主動表白，同時斬釘截鐵拒絕參加戀愛真人騷《女神2》，引來大批網民熱議。
講到近期播出的劇集，李海銅坦言呢個角色係自己入行兩年半以來，氣氛最沉重、戲份最重的一個。最初收到劇本，見到有咁多個人戲份、仲要同唔同演員搭建多條對手戲線，唔再係以往的群戲演出，當時真係緊張到不得了。佢大讚同劇演員陳滢全程照顧自己，尤其係一場借五千元的重頭戲，最初自己演繹的反應能量太大，被導演指風格唔合適，當時自信心大受打擊仲有NG，全靠陳滢主動捉住自己安撫情緒，陪住順對白、夾節奏，先順利完成呢場戲。對於角色第二集就突然「領盒飯」，李海銅就笑言連自己媽媽睇劇時都大感驚訝，同時賣關子指角色會繼續係回憶片段中出現，後續劇情仲會逐步揭露角色的死因同發現的秘密，叫觀眾記得緊貼劇情。
提到入行三年就迎來劇集密集播出的收成期，李海銅滿面感恩。佢話，由入行到而家，公司一直無間斷俾咗好多工作機會，令自己可以一路拍一路儲落滿滿的拍攝經驗，呢件事一直都令佢心存感激。佢坦言，由幾千人報名的藝員訓練班被選中開始，就已經覺得係天大的幸運，所以係公司的每一天、接到的每一個角色，都會好好珍惜、全力以赴。對於被網民定型為「富家女、白富美」專業戶，李海銅就澄清，其實自己試過好多唔同類型的角色：「《刑偵12》入面我係爛身爛勢的造型，仲有未播出的《飞常日志2》入面，我係一個好任性的KOL，都唔係白富美設定。」佢仲透露，除咗已經播出的劇集，未來仲有《夫妻的博弈》、《飞常日志2》等多套劇集會陸續同觀眾見面，大家可以期待佢唔同的一面。
被問到自己最大的長處，李海銅就笑言自己雖然係INFP的I人，私底下比較內向，但勝在好容易適應新環境，就算去唔同的劇組、面對唔同的合作對象，社交能力都完全OK，加上入行以來遇到好多前輩同同事照顧，呢個都係自己的一大優勢。
感情生活向來低調的李海銅，今次首度大方公開感情狀況，直認由入TVB的第一日開始，到而家為止都一直保持單身：「而家都係等人追階段，雖然一定係工作為先，平時都冇乜時間同人慢慢了解發展，但老實講，作為女生都想有人追㗎。」佢笑言自己對感情方面比較遲鈍，一定要男方「打直球」直白表白，先會感受到對方的心意：「我讀男女校出身，一直都有異性朋友，唔會覺得所有異性埋身都係有目的，如果你唔講得好直白，我根本唔會get到，到而家都未有人向我扔過直球。」
講到理想型，李海銅就話自己的底線係對方年紀一定要比自己大：「我鍾意被哥哥照顧的感覺，唔好係爸爸輩就OK。至於其他條件都冇乜所謂，我最講感覺，只要同對方有心靈連繫，咩條件都唔重要，最緊要係可以接得住我拋出來的所有嘢。」而就算遇到心儀對象，李海銅都堅稱絕對唔會主動表白：「我係絕對唔會開口表白的人，最多會主動接近佢、約佢出街、保持聯絡，呢個已經係我可以發出的最大signal。就算唔講會錯過，我都寧願錯過，都唔會主動表白。」
被問到會唔會考慮參加戀愛真人騷《女神2》，李海銅就斬釘截鐵咁話完全唔考慮。佢解釋，一方面自己想低調發展感情，唔習慣將私人感情擺係鏡頭前公開俾大眾睇；另一方面係完全唔習慣真人騷的拍攝模式：「如果我同一個人了解、相處、傾計嘅時候，有30部機對住我，我根本做唔到自己，會好唔自在。我覺得要了解一個人，一定要做最真實的自己，先可以吸引到真正鍾意自己的人，所以呢個節目我完全唔考慮。」
李海銅就話，現階段自己都係以工作為先，會繼續用心演好每一個角色，同時都笑言，都期待有合適的人主動向自己邁出第一步，未來會事業愛情兩方面都繼續努力。TVB
