無綫小花羅毓儀與男友林俊其咀住過情人節，林俊直認想過同居，甚至有結婚計劃，望5年內儲夠「老婆本」，絕不放過任何搵錢機會。羅毓儀則更大想頭，希望今年搵一千萬之餘，更期待跟男友擔任男女主角，滿足奉旨親密的願望。
藝人羅毓儀（Yuki）與林俊其（Kris）在無綫戀綜《女神配對計劃》配對成功，擁有「最萌身高差」的二人因為愛火而拉近距離，一見面就攬攬及咀嘴之餘，Kris又孭起女友，甜蜜爆燈。
拍拖半年的他們迎來第一個情人節，向來注重儀式感的Yuki預告會送重磅驚喜給男友。一對小情侶人前人後經常放閃，問到可有考慮同居時，Yuki口快快直認曾在Kris家過夜，又補充：「係打機、開直播搞到夜咗，冇諗長時間同居。」Kris則坦言：「都想嘅，不過想有個屬於自己嘅舒服地方先。（有結婚目標？）希望5年內，目標啫，可以遲過5年嘅。」Yuki順勢醒目表示何時同居要視乎外界反應：「要幾耐就要睇觀眾可唔可以畀多啲Job我哋，我今年目標係搵一千萬，搵咗錢先再諗。」她又指多得《女神》帶挈他們的人氣、工作量及收入都激增，希望日後可保持熱度。
談及Kris在劇集《非常檢控觀》跟關嘉敏飾演情侶惹CP粉反感，他開啟「怕老婆模式」，笑言：「準備（跪）鍵盤。」Yuki先禮後兵謂不會呷醋，還透露與男友一起煲劇作「事後檢討」。Yuki在新劇《臥底嬌娃》亦分別跟涂毓麟及吳子冲有肉搏戲，她先發制人謂：「拍嗰時我哋都未識，我求生意欲幾高。」Kris先表示會捧場，其後又謂會「嬲一陣」，Yuki聞言則安撫男友，指演員難得遇上角色就要珍惜，如揀戲只會抹殺機會，更想出兩全其美的方法：「最好就係我係女主角，佢係男主角啦。」
